Хоёр үдэрэй туршада үргэлжэлһэн буряад арадай дуу гүйсэдхэгшэдэй урилдаан элинсэг хулинсагайнгаа ирагуу гоёор нугалбаритуулан, анханда дуулажа ябаһан дуунуудые дуулаха, арадайнгаа баялиг хадагалан үлөөхэ дуратай 37 хабаадагшадые Агын «Амар сайн» театр соо суглуулаа.
Бүхы хабаадагшад наһанайнгаа хэмжүүрээр дүрбэн бүлэг болон хубаагдаа: 7-16, 17-35, 36-50 ба 51-һээ дээшэ наһан. Монголһоо ерэһэн, Шэнэхээнэй ба Үбэр Байгалай хизаараа түлөөлһэн эдэ олон хабаадагшадай 95дуу Агын Буряадай автономито тойрогой соёлой габьяата хүдэлмэрилэгшэ Баира Гомбожапова түрүүтэй жюриин гэшүүд сэгнэhэн байна. Хэд бэ гэбэл, Буряад Уласай арадай артист, Агын Буряадай автономито тойрогой соёлой габьяата хүдэлмэрилэгшэ Эржена Базарсадаева, Ородой Холбоото Уласай соёлой габьяата артист, Буряад Уласай арадай артист, Монгол Уласай соёлой эрхим Дарима Дугданова, Усть-Ордагай Буряадай автономито тойрогой соёлой габьяата хүдэлмэрилэгшэ, Усть-Ордагай Буряадай автономито тойрогой соёлой хүндэтэ хүдэлмэрилэгшэ Дарижаб Таршинаева, Монгол Уласай арадай артист Алтангэрэлэй Бутид, Монгол Уласай соёлой түрүү ажалтан Тумэрэй Нарансэсэг, Буряад Уласай габьяата артист Бутидэй Дондогсэрэн.
Түрүүшын үдэр 37 хабаадагшадай 21-иинь һагшагдан үлөөд, хоёрдохи үдэрынь тэдэнэй дундаһаа лауреадууд элирэн гараба. Нэрлэбэл, 7-16 наһанай бүлэгтэ Үбэр Байгалай хизаарай Согто-Хангилай Дари Гомбожапова, Москва хотын Александра Доржинимаева, Буряад Уласай Улаан-Үдэ хотын Дари Бадмаева гурбан; 17-35 наһанай бүлэгтэ Үбэр Байгалай хизаарай Могойто тосхоной Саяна Содномова, Монголой Дорнод аймагай Баттөмөр Ариунбат, Буряад Уласай Улаан-Үдэ хотын Амгалан Янданов; 36-50 наһанай бүлэгтэ Үбэр Байгалай хизаарай Могойто тосхоной Ирина Жигжитова, Эрхүүгэй можын Баяндайн аймагай Надежда Торноева, Монголой Улаан-Баатар хотын Насхай Батцэцэг; 51-һээ дээшэ наһанай бүлэгтэ Үбэр Байгал хизаар түлөөлһэн хоёр хабаадагшад – Шэтын Болот Раднаев ба Шэнэхээнэй Шадабай Санжидма, Буряад ороной Улаан-Үдэ хотын Номинь. «Алтаргана» нааданай арадай дуу гүйсэдхэгшэдэй урилдаанай лауреадуудта баталамжа, алтан медаль, 40 мянган түхэригэй сертификат барюулагдаа. Дулдаргын аймагай Зүдхэли нютагай Роза Одонова Дугарнима Уюинай нэрэмжэтэ тусхай шан – 40 мянган түхэригтэ хүртэһэн байна.