Мүнөөдэр, декабриин 9-дэ, Үбэр Байгалай хизаараар буряад соёл хүгжөөлгын түбтэ «Үльгэрнүүд, домогууд, магтаалнууд» гэһэн шэнэ суглуулбаритай танилсуулгын хэмжээ ябуулга дулаахан оршон байдалда үнгэргэгдэбэ.
Агын 1-дэхи дунда һургуулиин 9-дэхи ангиин һурагшад буряад хэлэнэй багша Б.Д.Балдандоржинатай хабаадажа, энэ суглуулбаритай, мүн хэблэлэй автор - Буряадай Уран зохёолшодой холбооной гэшүүн, Монголой соёл, ирагуу найрагай Академиин хүндэтэ гэшүүн, Могойтын аймагай «Сэдьхэлэй уянга» бүлгэмэй ударидагша, Монголой «Улирал ба зохиолч» сэтгүүлэй Буряад ороноор тусхайта сурбалжалагша Цындыма Бабуевагай намтартай, зохёохы замтайнь танилсаһан байна.
48 нюурһаа, 3 бүлэгһөө, 23 зохёолһоо бүридэһэн хэблэл олониитын һонирхол заатагүй татаха гээд тэмдэглэхэ хэрэгтэй. Зохёол бүхэн гүнзэгы удхатай, холын хараа бодолтой, баян хурса үгэтэй. Цындыма Бабуева онлайн аргаар хабаадахадаа, зохёолнуудай удхыень тайлбарилжа, илангаяа ургажа ябаа залуу үетэндэ хэрэгтэй, сэнтэй байһыень ойлгуулжа үгэһэн байна.
Һурагша Дондок Дугаров “Алханын домог” зохёолһоо хэһэг, Дандар Жамбалов, Дугар Доржипаланов, Роман Шойдоров “Тэмуджин” гэһэн ород хэлэн дээрэ магтаал олоной анхаралда уншажа, сугларагшадые баярлуулаа.
Үбэр Байгалай хизаараар буряад соёл хүгжөөлгын түбэй методист Дулма Мункуева хэмжээ ябуулгын шэмэг болгон, “Элһэн дободо” гэһэн буряад арадай дуу гүйсэдхэһэн байна.
Үбэр Байгалай хизаараар буряад соёл хүгжөөлгын түбэй методист, Үбэр Байгалай хизаарай соёлой габьяата хүдэлмэрилэгшэ Долгорма Долгоржапова үхибүүдтэ хандахадаа, арадайнгаа түүхэ намтараар, үльгэр домогуудаар, ёһо заншалаар һонирхохыень, түрэл хэлэн дээрээ хөөрэлдэхыень уряалаа.