Үсэгэлдэр, мартын 29-дэ, Үбэр Байгалай хизаараар буряад соёл хүгжөөлгын түбэй захирал Сэсэг Норполова Могойтын үхибүүдэй уран урлалай байшанай арадай аман зохёолой “Замбала” бүлгэмэй байгуулагдаһаар 5 жэлэй ойн баярта зорюулагдаһан “Буурал угай булагһаа” гэһэн тоглолтодо хабаадаһан байна.

С.Ж. Норполова бүлгэмэй хүтэлбэрилэгшэ Баира Дондокова-Замбалаевада, мүн бүлгэмэй гэшүүдтэ амаршалгын дулаахан үгэнүүдые хүргэхэдээ:

- Буряадайнгаа түүхэ, соёл, ёһо заншал, түрэл хэлэеэ үлөөхэ, хүгжөөхэ, улам дэлгэрүүлхэ гээшэ буянтай, юунһээшье сэнтэй. Бүлгэмэй хүмүүжэмэлнүүд урдан сагhаа дамжан ерэhэн арадайнгаа дуунуудта, үльгэр домогуудта, оньhон хурса үгэнүүдтэ, таабаринуудта эрхим бэрхээр һуража,  оршон тойронхи ажабайдалаа сэгнэхэ сагаахан сэбэр сэдьхэлтэй залуу үетэн хүмүүжэн гарана. Уран хурса буряад хэлэтэй, жэнхэни һайхан хубсаһатай эдир наадагшадые тайзан дээрэ харахадаа, арадайнгаа ерээдүйн түлөө омогорхол, урма баяр эзэлүүдгүй түрэдэг, - гэжэ тэмдэглээ.

Тиин Агын Буряадай тойрогой соёлой болон арадай аман зохёолой хүгжэлтэдэ, үхибүүдые зүбөөр хүмүүжүүлхэ хэрэгтэ эрхим заншалнуудые сахин үлөөлгэдэ горитой нүлөө үзүүлжэ байһандань халуун баярые хүргэбэ.

- Саашадаа бүлгэмэй одо мүшэн улам бүри ялалзажа, ажаябуулгатнай урагшатай, амжалтатай, һонин зохёолнуудаараа, ялас гэмэ найруулгануудаараа нютагайхинаа баясуулжал байгыт даа, - гэжэ үреэгээд, Үбэр Байгалай хизаараар буряад соёл хүгжөөлгын түбтэ бэлдэгдэжэ хэблэгдэһэн буряад хэлэн дээрэ номуудые болон суглуулбаринуудые методическэ туһаламжа болгон бариһан байна.

“Замбала” бүлгэм хаа-хаанагүй  үнгэргэгдэдэг арадай аман зохёолой бүлгэмүүдэй хоорондын мүрысөөнүүдэй эдэбхитэй гэшүүн, тэрэ тоодо Агын Буряадай тойрог дотор жэл бүри эмхидхэгдэдэг хүүгэдэй ёохорой хизаарай фестиваль-мүрысөөнэй эрхим хабаадагша мүн.