Энэ үдэр 1906 ондо Джон Стюарт Блэктонээр бо Альберт Смитээр «Комические фазы смешных лиц» гэһэн түрүүшын мультфильм буулгагдаһан юм.
Эдир наһан – хүүгэдэй оршон тойронхи байдалаа түрүүшынхиеэ анхаран мэдэржэ байһан һайхан хаһа. Эгээл энэ үедэ үхибүүд мультфильмнүүдые хараад, олон шэнэ, һонин юумэнүүдтэй танилсадаг, һайниие мууһаа илгаруулжа һурадаг.
Үбэр Байгалай хизаараар буряад соёл хүгжөөлгын түб һүүлэй жэлнүүдтэ совеэд үеын мультфильмнүүдые: «Жихарка», «Шоно ба тугал», «Саһан үбгэн ба хүхэ шоно», «Яблокатай тулам» - буряад хэлэн дээрэ оршуулжа, мультфильмнүүдые дахуулан уншажа, олоной анхаралда дурадхаһан юм. «Жихарка», «Шоно ба тугал» - Агын Буряадай тойрог дотор Анимационно киногой жэлэй хугасаада үнгэргэгдэһэн буряад хэлэн дээрэ мультфильмнүүдэй аймагууд хоорондын мүрысөөнэй илагша болоһон!
Мүн Шэнэ 2023 ониие угтуулан, түбэй мэргэжэлтэдээр «Новогодняя небылица» гэһэн мультфильм Агын уран гартанай хүүхэлдэйнүүдээр зохёон бүтээгдэһэн байна.
Хүндэтэ үхибүүд! Эдэ мультфильмнүүдые сүлөөтэйхэнөөр һуужа, баян буряад хэлэнэйнгээ үгэ бүхэниие анхаралтайгаар шагнан, мэдээгүйгөө эжы абаһаа асуун, удхыень ойлгон харахыетнай уринабди!
ЭХЭ ХЭЛЭН - МАНАЙ БАЯЛИГ, ХЭЗЭЭДЭШЬЕ САХИЖА ЯБАЯ ДАА!
Шандагаханууд, хэрмэхэнүүд,
Шоно, баахалдай, үнэгэн –
Дахяад таанадаа баярлуулхань,
Айлшаар шамдан ерэхэнь!
Таатай зохидхоноор hуужа,
Анхаран, hонирхон харагты,
Сэдьхэлээ хужарлуулан баясагты!