Манай гүрэнэй түүхэдэ 1941 оной  июниин 22 - Эсэгэ ороноо хамгаалгын Агууехэ дайнай эхилһэн үдэр - Мүнхэ дурасхаалай, уйдхар гашуудалай үдэр гээд нэрлэгдэжэ, жэл бүри үргэн дэлисэтэйгээр тэмдэглэгдэдэг. Эхэ оронойнгоо түлөө эрэлхэг зоригтойгоор тэмсэжэ, зэбүүрхэмэ муухай дайсаниие бута сохиһон хүбүүд басагадые, фашис лагерьта зобоогдоһон, ара талада хамаг хүсэ шадалаа элсүүлэн, Агууехэ Илалта шэрээлсэһэн элинсэгүүдээ һанаха, дурсаха үдэр. Дүрбэн жэлэй туршада галта  дайнай талмайнуудта шуһаяа адхан унаһан, нангин уялгаяа дүүргэһэн улад олоноо дурсажа, үбдэг дээрээ дохин һүгэдэнэбди!

Агын тойрогһоо Эсэгэ ороноо хамгаалхаяа 5860 хүбүүд, басагад мордоһон: таряашад, малшад, багшанар, аргашад, ангуушад, барилгашад... Тэдэнэй 2793-иинь байлдаанай гал дүлэтэ газар тэбэрин, алдалан унаһаниинь харамтай. Нютагаймнай сэрэгшэд дайнай газарта мэргэн буудагшад болон эрхим тагнуулшад, пехотинцүүд болон танкистнүүд, сапёрнууд болон артиллеристнүүд, лётчигууд болон эмшэд боложо суурхаһан юм.

Дайшалхы аша габьяагай түлөө нютагаймнай хүбүүд гүрэнэй үндэр нэрэ зэргэнүүдтэ, шан хайрануудта хүртэһэн, орден медальнуудаар шагнагдаһан.  

Базар Ринчино -  Советскэ Союзай Баатар. 1943 ондо Украинын Житомирско можодо баатарай үхэлөөр унаһан. Бельковцы нютагта хүдөөлүүлэгдэһэн.

Александр Парадович – Советскэ Союзай Баатар. Баатарай нэрэ зэргэ 1944 ондо олгогдоһон. Казахстанай Кустанай хотодо (мүнөө Костанай) ажаһууһан, 2001 ондо наһа бараһан.

Бадма Жабон - Ородой Холбоото Уласай Баатар. Агын Буряадай автономито тойрогой Хүндэтэ эрхэтэн. Баатарай нэрэ зэргэ 1996 ондо олгогдоһон.

Ерээдүй руу холые шэртэн, бидэндэ амгалан тайбан байдал асарһан аха захатанайнгаа баатаршалга хододоо һанажа ябаха, ургажа ябаа залуу үетэндөө жэшээ болгон харуулха гээшэ – манай сэхэ уялга мүн.

Хэншье мартагдаагүй, юуншье мартагдахагүй!