Мүнөө жэл, октябриин 12-һоо 15 болотор, Агын Буряадай тойрогой оюутадай дунда уран уншалгаар “Буряад хэлэеэ үргэн хүгжөөе!” гэһэн мүрысөөн Буряад хэлэнэй фестивалиин хэмжээндэ гурбадахияа үнгэргэгдэбэ.
Тус мүрысөөн түрэл буряад хэлэеэ үлөөн хүгжөөхэ, залуушуулые ном уншалгада һонирхуулха, нютагай авторнуудай буряад уран зохёолнуудые, шүлэгүүдые дэлгэрүүлхэ, оюутадай дунда эрхим уншагшадые элирүүлхэ, гүйсэдхэхы шадабарииень дээшэлүүхэ гол зорилгонуудтай юм.
Хоёрдохи жэлээ энэ мүрысөөн онлайн аргаар эмхидхэгдэжэ, 2 янзада үнгэргэгдэбэ. Нэгэдэхинь хадаа, Эхэ орон тухай шүлэгүүдые уранаар уншалга, хоёрдохинь – нютагай авторнуудай зохёолнуудай хэһэгүүдые уранаар уншалга болоно.
2019 ондо үнгэргэгдэһэн түрүүшын мүрысөөндэ Агын багшанарай колледжын, Агын эмнэлгын колледжын, Агын буддын шажанай академиин, мүн Могойтын аграрно-промышленна техникумэй дүн хамта 12 оюутад хабаадаһан һаа, үнгэрэгшэ жэл – 9 оюутад, харин мүнөө жэл 14 мүрысэгшэд, тэрэ тоодо гурбаниин хоёр янзада видеобуулгабаринуудаа эльгээбэ. Эндэ хадаа хабаадагшадые оролдожо бэлдүүлһэн хүтэлбэрилэгшэдэйнь үүргэ нүлөө горитой гэжэ тэмдэглэлтэй.
Буряад хэлэн дээрэ уран уншалгаар мүрысөөн ородшье яһанай басагад хүбүүдые һонирхуулдаг байһыень тодорхойлхо хэрэгтэй. Түрүүшын мүрысөөндэ Могойтын аграрно-промышленна техникумэй оюутан Василий Политаев хабаадажа, шангай 2-дохи һуури эзэлээ һэн. Энэл техникумэй оюутан Надежда Еськова мүнөө хоёрдохиео хабаадажа, шангай 3-дахи һуури эзэлбэ.
Мүрысөөнэй ажалнуудые шүүгшэдэй бүлэгэй түрүүлэгшэ - Ородой Холбоото Уласай уран зохёолшодой холбооной гэшүүн, Ж.Балданжабоной нэрэмжэтэ тойрогой литературна нэгэдэлэй гэшүүн Д.Б.Батоболотова, шүүгшэдэй бүлэгэй гэшүүд - Агын Буряайдай автономито тойрогой соёлой габьяата хүдэлмэрилэгшэ, Ж.Балданжабоной нэрэмжэтэ тойрогой литературна нэгэдэлэй гэшүүн Н.Ж.Доржипаланова, Б-Б.Намсараевай нэрэмжэтэ Агын аймагай түб номой сангай хизаар ороноо шэнжэлэлгын ажалаар таһагые даагша Б.Б.Батоева гэгшэд сэгнэжэ, дүн гаргаһан байна.
«Эхэ орон тухай шүлэгүүдые уранаар уншалга» янзада 14 мүрысэгшэд соо илгаржа, шангай 1-дэхи һуури Агын багшанарай колледжын оюутан Доржи Гомбоев (хүтэлбэрилэгшэнь – Б.Д.Цыпылова), 2-дохи һуури Агын эмнэлгын колледжын оюутад Елизавета Дугарова (хүтэлбэрилэгшэнь – Б.Д.Жамбалдоржиева), Сэсэг Должинова (хүтэлбэрилэгшэнь – Н.Ц.Паланова) гэгшэд, мүн 3-дахи һуури Агын багшанарай колледжын оюутан Арюна Митупова (хүтэлбэрилэгшэнь – Т.Т.Бадеева), Могойтын аграрно-промышленна техникумэй оюутан Надежда Еськова (хүтэлбэрилэгшэнь – Б.Ц.Тогонова) хоёр эзэлээ.
«Нютагай авторнуудай зохёолнуудай хэһэгүүдые уранаар уншалга» янзада гурбан лэ ажал ороо, тэдэнэй видеобуулгабаринууд соо Могойтын аграрно-промышленна техникумэй оюутан Алексей Понамаревай (хүтэлбэрилэгшэнь – Б.Ц.Тогонова) ажал үндэрөөр сэгнэгдэжэ, түрүүшын һуури эзэлбэ.
Мүн тиихэдэ ютуб-канал соо энэ мүрысөө харагшад Агын багшанарай колледжын оюутан Балто Арелтуевай видеобуулгабарида эгээл олон дуу үгэжэ, хабаадагша “Олон зондо һайшаагдаа” гэһэн тусхай шанда хүртэбэ.
Буряад хэлэн дээрээ найруулан шүлэг зохёохо талаан бэлигтэй залуушуулай ургажа байхада, ехэл һайшаалтай. Мүнөөдэрэй мүрысөөндэ Агын эмнэлгын колледжын оюутан Сэсэг Должинова “Намарай шарай” гэһэн өөрын зохёоһон шүлэг уранаар уншажа, “Залуу уран найруулагша” гэһэн тусхай шанда хүртэһэн байна.
Бүхыдөө мүрысөөнэй дүн согсолхо болоо һаа, оюутадай уранаар уншаха шадабари үшөөл хүгжөөхөөр гэжэ тодорхойлхоор байна. Тиимэһээ Үбэр Байгалай хизаараар буряад соёл хүгжөөлгын түбэй мэргэжэлтэд оюутадта уран уншалгаар мастер-класс эмхидхэхэ гэжэ түсэб табина. Зоной урда эшэн гайхангүй, үгэ бүхэнэй удхыень тобойн гаргажа шадаха, хэлэеэ уран нугархай болгохо гээшэ шухала. Буряад хэлэмнай – баян, гүнзэгы, гоё һайхан хэлэн ха юм даа.
Мүрысөөнэй илагшадай баталамжанууд, хабаадагшадай баярай бэшэгүүд эндэ: http://xn--80aab0bbg5aeejfegc7krbe.xn--p1ai/anonsy/polozheniya-festivalej-i-konkursov/835-diplomy-mezhmunitsipal-nogo-konkursa-khudozhestvennogo-chteniya-na-buryatskom-yazyke-buryaad-kheleee-rgen-kh-gzh-e-sredi-studentov-obrazovatel-nykh-organizatsij-professional-nogo-obrazovaniya
.