Жэл бүри алтан намарай һайхан сагта Агын Буряадай тойрогто Буряад хэлэнэй фестиваль үргэн дэлисэтэйгээр үнгэргэгдэдэг заншалтай. Фестивалиин хэмжээндэ олон хэмжээ ябуулганууд тойрогой бүхы наһанай ажаһуугшадай дунда эмхидхэгдэдэг, тэрэнэй тоодо - “Ага-интелект” мүрысөөн онсо һуури эзэлдэг юм. Мүнөө жэл тус мүрысөөн онлайн аргаар үнгэргэгдэһэн байна.

Энэ наадан хадаа анха түрүүшынхиеэ тойрогой залуушуулай зүблэлэй гэшүүн Татьяна Хундановагай  үүсхэлээр 2012 ондо залуушуулай дунда үнгэргэгдэһэн юм. Тэрэ сагһаа хойшо мүрысөөндэ хабаадаха дуратай зоной олон боложол байһаниинь тон һайшаалтай. Үнгэрэгшэ жэлдэ найман можо хабаадаһан һаа, мүнөө жэл 19 можо сугларжа, ухаан бодолоороо урилдаба.

“Ага-интеллект” нааданда Ага тосхонһоо хабаадагшад:

“Ага тосхон” хотын тойрогой захиргаанай “Агинское24” можо (хүтэлбэрилэгшэнь – Сталина Доржипаланова)

“ Ага тосхон” хотын тойрогой Дүүмын можо (хүтэлбэрилэгшэнь – Баир Царендоржиев)

Агын тойрогой гимнази-интернадай можо (хүтэлбэрилэгшэнь – Ирина Жапова)

Агын 1-дэхи дунда һургуулиин можо (хүтэлбэрилэгшэнь – Туяна Людофа)

Агын 2-дохи дунда һургуулиин можо (хүтэлбэрилэгшэнь – Янжима Намдакова)

“Далай” гэһэн хүүгэдэй сэсэрлигэй «Долгин» можо (хүтэлбэрилэгшэнь – Арюна Дугаржапова)

 «Үльгэр» хүүгэдэй сэсэрлигэй можо (хүтэлбэрилэгшэнь – Димчигма Цыбенжапова) хабаадаа.

Агын аймагһаа:

Агын аймагай соёлой байшанай “Согтой соёлшод” можо (хүтэлбэрилэгшэнь – Дамдин Ленховоев)

Урда-Ага нютагай “Урдо-Ага 83” можо (хүтэлбэрилэгшэнь – Олег Цыцыков)

 Гүнэй нютагай “Ургы” можо (хүтэлбэрилэгшэнь – Ольга Галсанова)

Дулдаргын аймагһаа:

Дулдарга нютагай “Урагшаа” (хүтэлбэрилэгшэнь – Светлана Цыденжапова), “Баруун тала” (хүтэлбэрилэгшэнь – Цыренханда Жамьянова), “Соёл-Дульдарга” (хүтэлбэрилэгшэнь – Доржо Димчиков)

Зүдхэли нютагай “Эрдэм” можо (хүтэлбэрилэгшэнь – Бутит Галсанова)

Могойтын аймагһаа:

“Сууряан” - Могойто тосхоной можо (хүтэлбэрилэгшэнь – Эржена Цыремжитова)

«Наран» - Хүһөөшэ нютагай можо (хүтэлбэрилэгшэнь – Оксана Жамбалова)

 «Бэлиг» – Ушарбай нютагай можо (хүтэлбэрилэгшэнь - Долсон Рабданова)

“Сагаан-Уула” – Сагаан Уулын можо (хүтэлбэрилэгшэнь – Бальжинима Багдаев)

Мүн тиихэдэ гүрэнэй дуу хатарай «Амар сайн» театрай түлөөлэгшэдһөө бүридэһэн «Баян далай» можо хабаадаа (хүтэлбэрилэгшэнь – Эржена Очирова).

Мүрысөөн 4 шатаһаа бүридэһэн байна:

Нэгэдэхинь - “Визуализация”. Монитор дээрэ 10 зураг тусхай асуудалнуудтайгаар үгтэнэ. Хабаадагшад 5 минутын туршада харюусаха ёһотой.

Хоёрдохи шатада удхыень тайлбарилжа харюусаха 10 асуудал үгтэбэ. Энэ шата 20 минутын туршада үнгэргэгдөө.

Гурбадахи шата – “Түргэн харюу”. Наадагшад мүн лэ 10 асуудалда 10 минутын туршада харюу үгэбэ.

Дүрбэдэхи шатада хүгжэм дуунай мүрысөөн соносхогдоо. Ямар нэгэн хүгжэм, дуу табяад, хэнэй бэшэһэн дуун бэ, хүгжэмынь хэнэйб, юун гэжэ нэрэтэй дуун гээшэб гэхэ мэтэ асуудалнууд асуугдаа. Эндэ 10 даабари байба. 

Хабаадагшад харюунуудаа бэшээд, телефоноор вайберай бүлгэм руу эльгээжэ байгаа. Нэгэ зүб харюу – нэгэ баллда тоологдоо, тиигэжэ иимэ дүн гаргагдаһан байна.

I һуури - Агын аймагай соёлой байшанай “Согтой соёлшод”, Дулдарга нютагай “Урагшаа”;

II һуури - Могойто тосхоной “Сууряан”;

III һуури - Агын 2-дохи дунда һургуулиин можо, Дулдаргын “Баруун тала”.

Гэр бүлөөрөө можо болоод, мүрысөөндэ хабаадагшад “Молодежь Аги” эмхиһээ тусхай шанда хүртэһэн байна.