Мүнөө жэл Пионериин бүхэсоюзна эмхиин байгуулагдаһаар, тэбхэр зуун жэл үнгэрбэ. Тус эмхиин дэргэдэ хэдэн олон үеын үхибүүд хүнэй тон һайн шэнжэнүүдые - Эхэ орондоо үнэн сэхэ, дуратай байха, бэе бэетэеэ нүхэсэхэ, туһалха шадабаринуудые бэедээ шэнгээн урган хүмүүжэһэн юм.
Агын пионериин эмхи 1924 ондо байгуулагдаһан юм. Тэрэ ондо аймагай РКСМ-эй дэргэдэ эдир пионернүүдэй аймагай бюрөө үүдэеэ сэлижэ, түрүүлэгшээрнь Батомунко Ванданов томилогдоһон. 1925 оной эхиндэ пионернүүдэй табан отрядуудта 216 пионернүүд ороһон байна. Удаадахи жэлынь 8 отрядта 802 пионернүүд тоологдоо. Агын талын хүдөө нютагуудай гудамжануудаар ягаа улаахан үнгэтэй шэб шэнэхэн галстугуудтай түрүүшын пионернүүд улаан тугтай, горн болон барабануудай хонгёо абяан доро омогтой алхалалдан ябадаг һэн.
Хамтаралай үедэ Агын пионернүүд тарилга хуряалгын, үбһэ тэжээл бэлэдхэлгын кампанинуудта эдэбхитэйгээр хабаадалсадаг байгаа. Пионерэй агитбригаданууд хүдөө һуурингуудаар концерт болон зүжэг наадануудые табидаг, мүн агрономическа, санитарна мэдэсэнүүдые арад зоной дунда нэбтэрүүлхэ, эрдэм мэдэсэгүй байлгые усадхаха талаар хэмжээ ябуулгануудта хабаадалсадаг һэн. Аймагууд дотор саг үргэлжэ отрядууд суглардаг, гар урлалай: модоор дархалалгын, оёдолой кружогүүд эмхидхэгдэдэг бэлэй.
Дайнай хатуу үедэ Агын пионернүүд томо зонтой адли үдэр һүнигүй таряалангууд болон һүнэй фермэнүүдтэ ажаллажа, “Бүхы юумэн - фронтдо! Бүхы юумэн – Илалтада!” гэһэн уряа дүүрэн хүсэдөөр бэелүүлэлсэдэг байгаа. Дайнай һүүлээрхи жэлнүүдтэ тэдэнэр арадай ажахы һайжаруулан тогтоолгодо туһалалсаа. 1949 ондо Агын һургуулинуудай дэргэдэ гүрэнэй дүүрэн хангалта доро үхибүүдэй байха байрануудай нээгдэхэдэ, ажаһуугшадта ехэ баяр болоо һэн. Энэ үйлэ хэрэг Агын тойрогой ургажа ябаа багашуулые һургалгада болон хүмүүжэлгэдэ горитой нүлөө үзүүлһэн байна.
Тойрогой түүхэдэ пионер болон комсомолой үе сагууд бата бэхи һуурияа олонхой. Мүнөөдэр һургуулиин хүүгэдэй ниитэ эмхи зургаануудай ударидагшад болон эдэбхитэд ажаябуулгадаа аяар 100 жэлэй түүхэтэй пионерэй эмхи зургаанай эгээл һайнииень үлөөн хэрэглэдэг юм.
Агын Буряадай тойрогой сайтһаа материал буряадшалагдаба.