Россиин номой сангай ассоциациин президент Владимир Зайцевай үүсхэлээр Ородой Холбоото Уласай президент Борис Ельцин 1995 оной майн 27-до «Бүхэроссиин номой сангуудай үдэр» тогтооһон байна. Тэрэ сагһаа хойшо номой сангай ажалтад энэ үдэр мэргэжэлтэ һайндэрөө тэмдэглэдэг болоһон. Энэ үдэрнүүдтэ номой сангуудта олон янзын һонирхолтой хэмжээ ябуулганууд эмхидхэдэг заншалтай.
Ага нютагта 1898 ондо эрдэмтэн Цыбен Жамцараногой үүсхэлээр түрүүшын номой сан байгуулагдаһан юм. 1919 ондо тус номой сан аймагай зэргэтэй болоһон, арад зоной үзэг бэшэгтэ һураха хэрэгтэ угаа ехэ хубита оруулһан юм. Номой сангай эгээн түрүүшын библиотекареэр Цэпэл Зодбоев ажаллаһан байна. Мүнөөдэр Агын хизаарай Цыбен Жамсараногой нэрэмжэтэ номой сан амжалта түгэс ажаллаа үргэлжэлүүлнэ.